Qasida e Meraj | Sharah(Explaination) | Last Part | Kalaam e Aala Hazrat

#49)

Badhe To Lakin Jhijhakte Darte Haya Se Jhukte Adab Se Rukte

Jo Qurb Unhi Ki Ravish Peh Rakhte Laakho Manzil Ke Fasle The

Word Meaning:👇

Jhijhakna: Sharmana

Qurb: Nazdeek

Ravish: Raftaar

Tashreeh:

Ab Huzoor Purnoorﷺ aage Badhe to lakin Sharm o Haya ka Peekar ban kar Khauf e Khuda ka Libada odh kar, badhe hi adab wa Ehtraam ke saath. Agar Allahﷻ Huzoor ki raftaar hi par mulaqaat rakhta laakho saal ke Fasile hote.

#50)

Par Unka Badhna To Naam Ko Tha Haqiqatan Fa’al Tha Udhar Ka

Tanazzalo Me Taraqqi Afza Dana Tadalla Ke Silsile The

Word Meaning:👇

Haqiqatan: Dar-Asl

Tanazzal: Utarna, Neeche Aana

Afza: Jayadah Hona

Dana Tadalla: Qareeb hua, Bahote Qareeb hua

Tashreeh:

Huzoor ka badhna to sirf naam ka tha kyu ki agar huzoor apni raftaar se badhte to lakho baras lag jaate lakin Asl me maamla udhar ka tha Allahﷻ ne Fazal farmaya aur faslo ko samet kar Huzoor ki Taraf apne Shaano karam se Huzoor ki taraf Nazil hua aur

 ثُمَّ دَنَا فَتَدَلّٰىۙ(۸)فَكَانَ قَابَ قَوْسَیْنِ اَوْ اَدْنٰىۚ(۹)

 “fir wo jalwa qareeb hua phir aur jayeda qareeb ho gaya. To Do Kamano balki us se kam fasla rah gaya.(Surah Najm: 8-9) ”

 ka Qurb ata farmaya.

#51)

Hua Yah Akhir ki Ek Bajra Tamooj Bahar e Hu Me Ubhra

Dana Ki Godi Me Un Ko Lekar Fana Ke Langar Utha Diye The

Word Meaning👇:

Bajra: Dariya me Ser karne ki ek Khushnuma kashti jo Neeche se gol hoti hai

Tamooj: Dariya me lahre uthna, Talatum

Hoo: Allahu, Muraad Allah Ta’alah

Dana: Qurb

Fana: Khatam

Langar: Kashti ki rassi, jise khol kar dariya me kashti baha di jaati hai

Tashreeh:👇

(Huzoor aage badh rahe the, pichhle Asha’ar me) Ab Akhir me hua ye “Bahar e Hu” Allah ki Anwaar o Tajalliyaat ke samundar me se ek Noor ki kashti nikli aur ek Qareeb kar ke dana ki god me le kar fana ke sare langar utha diye the, yani ab Huzoor Jaat e Bari Ta’alah ke Jalwo me fana hone ja rahe the.

#52)

Kise Mile Ghaat Ka Kinara Kidhar Se Gujra Kaha Utaara

Bhara Jo Misl e Nazar Tarara Apni Aankho Se Khud Chhupe The

Word Meaning:👇

Ghaat: Dariya ka wo kinara jaha sawari kashti se utarti hai

Tarara: Chhalaang Lagana

Tashreeh:👇

Wahdat ke Samundar ka ghaat aur kinara hi nahi hai koi kya bataye ki Noor ki kashti Huzoor ko kis raaste se le gayi aur kaha utaran fir Huzoor ne Kashti se kis tarah chhalang maari. Huzoor Haq Ta’alah ke jawlo me fana ho chuke the ki unhe khud khabar na thi koj jaanta wo khud apni aankho se chhupe hue the.

#53)

Uthe Jo Qasr e Dana Ke Parde Koi Khabar De To Kya Khabar De

Wahan To Jaahi Nahi Dooi Ki Na Kah Ki Wah Hi Na The Are The

Word Meaning:👇

Qasr e Dana: Qurb ka Mahel

Dooi: Jo Jaten Ek Jagah Hona, Do Samajhna

Are: Ta’ajjub ke liye kahna, e.g.: Are! Ye kaise hua.

Tashreeh:👇

{Aapﷺ ne farmaya jis ka mafhoom hai ki; Mere aur Khuda ke darmiyan ek ayesa waqt bhi aaya ki jis me na koi muqarrab Farishta aa sake aur naa hi koi Nabi Rusul. Dooi ke Khatam hone se yahi muraad hai ki mulaqaat ke waqt sirf mai hi tha aur koi doosra nahi tha ya khud ki hasti ya Mustafa(ﷺ) ki hasti thi} Qurb ke Mahel ke tamaam Pardo ko utha diya gaya ab aage kaun bataye ki kya hua, kyu ki waha to doi ki bhi gunjaish nahi thi magar yah na samajhna ki aapﷺ bhi waha na the. Are! Aap to udhri the, aap hi ke liye to sab kuch kiya gaya hai.

#54)

Wah Baagh Kuchh Ayesa Rang Laaya Ki Ghuncha wa Gul Ka Farq Uthaya

Girah Me Kaliyo Ke Baagh Phoole Gulo Ke Tikme Lage Hue The

Word Meaning:👇

Ghuncha: Kali,bud

Girah: Bandish, Gaanth

Tukme: Girebaan ka Halqa, Ghanthi

Tashreeh:👇

Is Gulshan e Wahdat me kuchh ayesa manzar dikhai diya ki Kali wa Ghuncha bhi chatak kar phool dikhai dene lage, Kaliyo ke daman me bhi phool khil uthe aur Gulshan mahekne lage aur un ke Girebaan ke batno ki jagah phool hi saje hue the.

#55)

Muheet wa Markaz Me Farq Mushkil Rahe Na Fazil Khutoot Wasil

Kamane Hairat Me Sar Jhukaye Ajeeb Chakkar Me Dayere The

Word Meaning:👇

Muheet: Dayera, Circle

Markaz: Center

Fazil: Juda Karne Wala

Khutoot: Lakeer, Line

Wasil: Milne Wala

Tashreeh:👇

Is Shaer me Ilm e Geometry se baat samjhai gayi hai,circle ke liye jab parkaar center me rakha jata hai to parkaar jhuk kar circle banata hai, aur circle banne ke baad ye nahi pata chalta ki kaha shuru hua aur kaha par khatam, Isi Huzoor Safar e Meraj bhi hai koi bata hi nahi sakta hi kaha shurua aur kaha kaha khatam hua, bas Safar e Meraj hua.

#56)

Hijaab Uthne Me Lakho Parde Har Ek Parde Me Lakho Jalwe

Ajab Ghadi Thi Ki Wasl wa Furqat Janam Ke Bichhde Gale Mile The

Word Meaning:👇

Hijaab: Niqaab, Parda

Ajab: Ajeeb

Ghadi: Lamha

Wasl: Milaap

Furqat: Judai

Janam: Paida

Bichhda: Juda hua

Tashreeh:👇

Furqat ke Ek Parde me uthne me Noor ke Lakho Parde uth rahe the aur us Pardo me lakho jalwe the wo kaisi ajab Ghadi thi ki ayesa lag raha ki jaise Judai aur Milaap jis din paida hue the us din se le kar aaj tak apas me nahi mile the aur ab mulaqat hui to khoon jam kar gale mile.

Jubane Sukhi Dikha Ke Maoze’n Tadap Rahi Thi Ki Pani Paye

Bhanwar Ko Yah Za’af Tashangi Tha Ki Halke Aankho Me Pad Gaye The

Word Meaning:👇

Maoze’n: Paani ki Lahrey

Bhanwar: Paani ka Chakkar

Za’af Tashangi: Payas ki Kamzori

Halke: Dayre(Pyas ki Shiddat se Aankhe Dab Jaana)

Tashreeh:👇

Darya e Wahdat ki Maozey bhi apni Khushk Juban dikha kar shikayat kar rahi thi aur Wasl(Milaap) ke pani ka Mutalba kar rahi thi aur bhanwar khud itna payasa nazar aa raha tha ki pyas se aankho pa halqe padh gaye the aur wah dhansi ja rahi thi.

#58)

Wahi Hai Awwal Wahi Hai Akhir Wahi Hai Batin Wahi Hai Jahir

Usi Ke Jalwe Usi Se Milne Usi Se Us Ki Taraf Gaye The

Word Meaning:👇

Awwal: Pahla

Akhir: Pichhla

Jahir: Waajah, Khula

Batin: Chhupa

Jalwe: Tajalliyaat

Tashreeh:👇

Allah Ta’alah hi Awwal hai wahi Akhir hai wahi hai Jahir wahi hai Batin hai(Yaha Awwal wa Akhir Akhir, Batin wa Jahir se Huzoor ﷺ bhi Muraad liye ja sakte, Allah me sab se Pahle Apne Noor se Huzoor ke Noor ko banaya, aapﷺ ankhri Nabi hai, Aapﷺ sab par jahir bhi hai lakin batin bhi hai jo sirf Huzoor aur Allah hi Jaante hai)aur Huzoor Purnoorﷺ Khuda ke Jalwe hai to ye Jalwa Asl Jalwe se milne gaye tha.

#59)

Kaman e Amkaan Ke Jhute Nuqto Tum Awwal Akhir Ke Pher Me Ho

Muheet Ki Chaal Se To Poochho Kidhar Se Aye Kidhar Gaye The

Word Meaning:👇

Kamaan: Dhanush

Amkaan: Mumkin

Nuqta: Point

Pher: Chakkar

Muheet: Dayera

Tashreeh:👇

Aye Alam e Amkaan ki Kamaan ke Jhute Nuqto! Tum to Abhi tak Awwal wa Akhir ke Chakkar me phanse hue ho are Dayere ke chaal se maaloom karo ke Qaaba Qausaini Ao-Adna ke Qurb wala Mahboob Fana wa Baqa ki Manzile Tey karte hue kidhar se aye aur kidhar gaye. Jab Dayera ban jata hai to kisi ko kuchh pata nahi chalta ki ye kaha se shuru’a hua aur kaha khatam hua?

#60)

Idhar Se Thi Nazar e Shah Namaze Udhar Se An’aam Khusrawi Me

Salaam wa Rahmat Ke Haar Gundh Kar Guluye Purnoor Me Padhe The

Word Meaning:👇

Nazar e Shah: Badshaah ka Tahfa

Khusrawi: Shaahi, Shahana

Gundh Kar: Piro Kar, Bana Kara

Guluye Purnoor: Noorani Gala, Gardan(Neck)

Tashreeh:👇

Huzoorﷺ ki taraf se Allah ki bargah me Namazo, Ibadato ke Nazraane Pesh kiye jaa rahe the aur Allah Ta’alah ki taraf se Aaqaﷺ ko Shaahi In’amaat se nawaza ja raha tha, Darood wa Salaam ke haar Rahmat ki ladiyo pe piro kar Huzoor Purnoorﷺ ke Purnoor gale me dale ja rahe the, Huzoor Arz kar rahe the “Attahyatu Lillahi Wassalwatu wattayyabatu” Allah Ta’alah farma raha tha “Assalaamu Alayka Ayyuhannabi wa Rahmatullahi wa Barakatuh”.

#61)

Jubaan Ko Intajaar e Guftan Gosh Ko Hasrat e Shunidan

Yaha Jo Kahna Tha Kah Liya Tha Jo Baat Sunni Thi Sun Chuke The

Word Meaning:👇

Guftan: Guftagu

Gosh: Kaan, Ear

Shunidan: Sunna

Tashreeh:👇

Jubaan kuchh kahne ke intejar me thi aur Kaam kuchh sunne ke magar jubaan aur kaan ko hasrat hi rahi, jo kahni thi kah chuke the jo sunna tha sun Chuke tha.

#62)

Wah Burj Batha Ka Maah Paara Bahisht Ki Saer Ko Sudhara

Chamak Pe Tha Khuld Ka Sitara ki Is Qamar Ke Qadam Gaye The

Word Meaning:👇

Burj: Gumbad, Dayare Asmaan ka Barhawa Hissa, Constellation

Batha: Makkah Muazzama

Maah Paara: Chaand ka Tukda

Bahisht: Jannat

Sudhara: Rawana

Tashreeh:👇

Batha ke Burj ka Mahtab Jab Shab e Meraj ki Raat Jannat ki Saer karne gaye to jannat ke muqaddar ka Sitara chamak utha ki Is Chaand yahi Huzoor ke Qadam us par hai wo use bosa le raha tha.

#63)

Sarwar e Muqaddam Ki Roshni Thi ki Tabisho Se Mah e Arab Ki

Jina’h Ke Gulshan The Jhaad Farsi Jo Phool The Sab Kanwal Bane The

Word Meaning:👇

Sarwar e Muqaddam: Aane ki Khushi

Tabisho: Tajalliyo

Mah e Arab: Arab ka Chaand

Jina’h: Jannate’n

Gulshan: Bagh

Jhaad Farsi: Kante Daar Farsh

Kanwal: Lotus

Tashreeh:👇

Huzoor Purnoorﷺ ki Amad Amad thi ki Roshaniyo ka Bahaar tha, Har Taraf Roshni hi Roshni thi aur ye sab Arab ke Chaand (Huzoor Purnoorﷺ) se phoot rahi thi, aur Jannat ke Baagho ki Jhaad farsh bane jis ki wajah sab Phool Kanwal dikh rahe the, yani Jannat Huzoor ke Qadmo tale thi aur Huzoor ke sadqe me Jannat ke sab Phool Kanwal lag rahe the.

#64)

Tarab Ki Nazish ki Haa Lachakiye Adab Wah Bandish ki Hil Na Sakiye

Yah Josh Zid-dain Tha ki Paude Kasha Kash e Arrah Le Tale The

Word Meaning:👇

Tarab: Khusi wa Musarrat

Nazish: Nakhra

Lachakiye: Jhukiye

Hil Na Sakiye: Harkat na Karpana

Zid-dain: Do Mukhalif Cheeje

Kasha Kash: Bharpoor

Arrah: Lakdi Cheerne ka Aala (Saw)

Tale: Neeche

Tashreeh:👇

 Khushi wa Musarrat ka taqaza tha ki khoob uchhal kood ki jaye lakin Adab wa Ehtaram ka Taqaza tha ki Harkat na kare, (Jaise Sahaba Karaam Huzoor ki bargah me baithe the, ki Agar un ke Saro par Parinde anda de de to wo neeche na gire) Khushi wa Adab ke Paude(Tree) Isi do Zid-dain kashmakash ki wajah se Pareshani ke Aare ke neeche be-bas dikhai de rahe the.

#65)

Khuda Ki Qudrat ki Chaand Haq Ke Karodo Manzil Me Jalwah Kar Ke

Abhi Na Taaro Ki Chhao Badli ki Noor Ke Tadke Aa Liye The

Word Meaning:👇

Jalwah: Deedar

Chhao: Saaya (Shadow)

Tadke: Ujale

Tashreeh:👇

Khuda ki Shaan dekhiye ki Allah ke Chaand Mustafaﷺ Karodo Manzilo par apna jalwa dikhar kar wapas aaye to sitare abhi chamak rahe the, goya Subah Sadiq lag raha tha lakin abhi Subah Sadiq bahot door thi, kyu ki ye sab raat ke kuchh hisse me hua, aur itna kuch kar ke wapas aa gaye, kundi hil rahi thi, bistar garam tha, Wazu ya Ghusl ka Pani abhi bah raha tha.

#66)

Nabi e Rahmat Safi’a e Ummat Raؔza Pah Lillah Ho Inayat

Use Bhi Un Khil’aton Se Hissa Jo Khaas Rahmat Ke Waa’n Bate The

Word Meaning:👇

Nabi e Rahmat: Rahmat Karne Wale Nabi

Safi’a e Ummat: Ummat ki Safa’at Karne Wale

Raza: Ahmed Raza, Aalahazrat ka Takhallus (Pen Name)

Lillah: Allah ke Waste

Inayat: Maherbaani

Khil’aton: Khil’at ki Jama, Joda, Suite, Libaas

Waa’n: Wahan

Tashreeh:👇

Aye Mere Rahmat wa Karam farmane wale Aaqa! Ummatiyo ki Safa’at farmane wale Aaqa! Apne is Gada-gar Ahmad Raza par bhi Allah ke Waste Maherbaani ho jaye aur Me’araj ki Raat Bargah e Khudawandi se Aap ko jo Khaas Rahmaten Aata hui thi, us ka zarrah mujhe ko mil jaye.

#67)

Sana e Sarkaar Hai Wazeefa Qabool e Sarkaar Hai Tamanna

Na Shayeri Ki Hawas Na Parwa-rawi Thi Kya Kaise Qafiye The

Word Meaning:👇

Sana e Sarkaar: Sarkaarﷺ ki Taareef

Qabool e Sarkaar: Sarkaarﷺ ka Qabool karna

Tamanna: Khawaish

Hawas: Chahat

Parwa: Fiqr

Rawi: Qafiye ka Akhri Hurf

Qafiya: Radeef se pahle aane wale Hum-Awaz Alfaaz

Tashreeh:👇

Ya Rasoolallahﷺ aap ki Taareef wa Tauseef Mera Wazeefa hai aur Aap ki bargah me is ka Qabool hona meri sab se zindagi ki Khawaish hai, warna mujhe Shayeri wagaira ka Shauq nahi, aur naa hi mujhe is ki koi laalach hai ki mere naam me dhanke baje ki kya kaise Qafiye hai. Bas Ya Rasoolallahﷺ yahi Tamanna hai jo bhi kahu, likhu aap ki bargah me qabool ho jaye.

Khatam e Qasida-e-Meraj & Dua Ashiqo ki Meraj hojaye…

  

Alhamdulillah Qasida-e-Meraj ki Sharah Complete hui ise padhe aur khoob khoob share kare. Duao me yaad  rakhe. Aap kisi kalaam ki Sharah chahte hai to comment box me message kare.